Флегматик

Кини саамай уустук да түгэҥҥэ наҕыл быһыытын бырахпат, туруоруллубут сыалы хайаатар да ситиһэр, тиһэҕэр тириэрдэр үгэстээх. Быһаарыллыбыт былаанын эмдэппэккэ тутуһар, ырыҥалаан, толкуйдаан сылдьарын сөбүлүүр. Күүстээх өрүтэ. Бэйэтигэр эрэллээх, бигэ туруктаах, дьаныардаах, стрессоустойчивай. Мөлтөх өрүтэ. Өр кэмҥэ хоргутуон, хом санаалаах хаалыан сөп. Бытаан, өр кэмҥэ быһаарыммакка эрэйдэниэн сөп. Уларыйыыларга, саҥаҕа бытааннык үөрэнэр.

Меланхолик

Түргэнник сылайар, саҥата суох, мунчаарыыга ылларыамтыа киһи. Иэйигитии туругун үчүгэйдик билэр, өҥүн- дьүһүнүн араарар. Сэрэнэн- сэрбэнэн сылдьарын, мээнэ саҥа билсиһиилэри олохтообокко буоларын сөбүлүүр. Толлугас, килбик, куттас майгылаах. Күүстээх өрүтэ. Баай ис эйгэлээх. Сэрэйэр, таайар уратылаах. Айар- тутар эйгэҕэ, тобуллаҕас толкуй үлэтигэр сыстаҕас. Мөлтөх өрүтэ. Олус хоргус, мунчаарыыга ылларымтыа. Куруук саарбахтыыр, быһаарыныыта суох. Дьон саҥатыгар киирэн биэриэн сөп.

Холерик

Холорук курдук ытыйан олорор, түргэн туттуулаах- хаптыылаах, биирдэ манна, биирдэ онно сылдьар киһи. Олус түргэнник быһаарыныыны ылынар, уларыйымтыа майгылаах. Тулалыыр дьону кытта сыһыана халыс, өһүргэтиэн да сеп. Саҕалаабытын хаалларан идэлээх. Биир дьарыктан атыҥҥа көһөрө дөбөҥ. Дьон болҕомтотун олус сөбүлүүр. Күүстээх өрүтэ. Айылҕаттан айдарыылаах салайааччы, бэйэтин харыстаабакка талбыт дьарыгар аныыр. Күчүмэҕэй түгэннэргэ хомуллуон сөп. Ууттан кураанах тахсар дьикти сатабыллаах. Мөлтөх өрүтэ. Саҕалаабытын тиһэҕэр тириэрдибэт. Ыгым, кыыһырымтаҕай буолуон сөп. Туруга олус түргэнник уларыйар.

Сангвиник

Тыыннаах, үтүө майгылаах. Көхтөөх үлэһит, үөрэнээччи. Саҥаны сэҥээрэр, барыны барытын билэ- көрө сатыыр. Кылгас кэм иһигэр эрэллээх доҕор буолуон сөп. Уһуннук хомойо барбат, ыарахан кэмҥэ уустугурдубакка биир кэм наардаан быһаарар. Күүстээх өрүтэ. Көхтөөх, чэпчэки, үөрүнньэх майгылаах. Дьону кытта түргэнник биир тылы булар, элбэх доҕоттордоох, саҥа билсиһиилэри сэҥээрэр. Киниттэн олус үчүгэй үлэһит эбэтэр араатар тахсыан сөп. Мөлтөх өрүтэ. Көтүмэх. Аралдьыйыыта, саҥа сүүрээнэ суох кэхтиэн сөп.